巴西國家隊主帥安察洛堤公布備戰今屆世界盃決賽周55人初步名單，最受注目係34歲鋒線老將尼馬榜上有名，有望第4度出戰呢項大賽。

尼馬自從2023年世界盃外圍賽，為巴西出戰烏拉圭，受重傷之後，再未披上「森巴兵團」波衫，加上斷斷續續出現唔少傷患問題，令外界睇淡尼馬參加今屆世界盃機會。不過，呢位射手並冇放棄，作出唔少努力，包括上年12月底接受手術，希望根治左膝傷患。

尼馬今季保持不俗狀態，上場巴甲又入1球，協助山度士以2比0擊敗巴拉干天奴紅牛，近17次上陣入11球及4次助攻。安察洛堤曾經表示，只會揀選有100%狀態嘅球員參加世界盃，佢似乎滿意尼馬表現。

尼馬總共為國家隊累積入79球，屬於巴西史上最多入波球員，當中2014年世界盃有4球進帳，2018及22年世界盃各入2球。車路士19歲新星艾斯迪華奧因傷冇份入選55人名單，預料安察洛堤將於5月底公布最終26人參賽名戰，尼馬能否成為一員，大家拭目以待。

最強博彩盤路過關神器《串績王》：http://win.on.cc/football/